Cambio de tempo para a vindeira semana

Esta fin de semana gozamos dun tempo anticiclónico en toda Galicia, aínda que hoxe o achegamento dun sistema frontal pouco activo deixará nubes e incluso algunha chuvia feble no norte da Coruña e na Mariña de Lugo. Mañá e o luns o anticiclón xa estenderá a súa influencia a toda a Comunidade polo que gozaremos de tempo seco e soleado. Ademáis as temperaturas tenderán a ascender a partir de mañá. Este anticiclón que comezaba na xornada de onte está deixando temperaturas baixas, principalmente durante as noites, pola combinación de aire frío na columna atmosférica, ceo despexado na madrugada e vento en calma. Tanto na madrugada de onte como na de hoxe rexistráronse incluso algunhas xeadas. Isto xa non sucederá nin mañá nin o luns.

Pero seguimos con este tempo típicamente primaveral e o martes comezaremos a notar os síntomas dun cambio que se manifestará xa completamente o mércores, e amaeza con deixar un Día das Letras Galegas un tanto desapracible. Na imaxe seguinte podedes ver o prognóstico para o vindeiro mércores ao mediodía.

Apréciase a borrasca situada sobre Irlanda e o aire frío nas capas medias e altas da atmosfera en cores verdes. Vemos que Galicia estará xa no seu radio de acción polo que a inestabilidade e as consecuentes chuvias son caseque inevitables con esta situación.  Esta borrasca formarase nos días anteriores sobre Islandia e por iso traerá tanto aire frío, de xeito que tamén as temperaturas serán baixas, poidendo incluso reaparecer a neve nas cotas máis altas de Galicia. A previsión é que nos seguintes días continúe afectándonos, aínda que estando en primavera, os prognósticos a medio prazo non son moi fiables, polo que habeŕa que seguir as informacións do tempo durante a vindeira semana.

Saúdos,

Juan Taboada

MeteoGalicia

 

Publicado en Sen categorizar | Deixa un comentario

Continúa a variabilidade primaveral

Esta estación estase a comportar polo momento dun xeito bastante típico, é dicir, con variacións bastante bruscas entre os períodos inestables de borrasca e os máis estables de anticiclón. A pasada semana foi un reflexo moi claro, cuns primeiros días fríos e húmidos, rexistrándose incluso nevaradas por riba dos 1000 metros de altura, unha xornada de xoves de transición, con ceo despexado, pero aínda frío, e unha fin de semana de tempo seco, solleiro e con temperaturas elevadas.

Pois ben, esta semana preséntase moi semellante. Entre onte luns e mañá mércores viviremos baixo a influencia dunha borrasca. A diferencia da semana pasada son as temperaturas, xa que esta borrasca trouxo ventos de compoñente sur e polo tanto as temperaturas serán bastante suaves. Pero de novo o xoves entrará o anticiclón, e tamén comezará frío, con previsibles xeadas en zonas de montaña e valores mínimos por debaixo dos 5ºC en vales do interior, pero a medida que se achegue a fin de semana continuaremos na influencia do anticiclón, de xeito que o ceo seguirá moi despexado, pero a masa de aire será máis cálida, polo que subirán as temperaturas e viviremos novamente unha fin de semana  de sol e por momentos temperaturas elevadas. Na seguinte imaxe podedes ver a previsión da masa de aire para o vindeiro domingo ao mediodía.

Pódese ver como a Galicia chegará unha masa de aire de orixe africana, aínda que bastante transformada, polo que as temperaturas non serán moi altas, pero si elevadas para a época do ano.

Saúdos,

Juan Taboada

MeteoGalicia

Publicado en Sen categorizar | Deixa un comentario

Cambio de tempo a partir do venres

Logo dalgunhas xornadas de tempo anticiclónico, a partir deste venres viviremos a chegada dunha masa de aire frío e húmido procedente do Atlántico norte. O período anticiclónico tivo un comezo relativamente frío, pero dende o pasado martes aos ceos despexados podémoslle engadir a chegada dunha masa de aire cálido. Isto deixou os primeiros rexistros superiores aos 30ºC en puntos de val do interior. Concretamente nos concellos de Arnoia e Leiro da provincia de Ourense e na parte sur do concello de Pantón. Pero este episodio rematará mañá xoves, con temperaturas que no interior serán aínda altas. O venres haberá un notable descenso nas temperaturas máximas, aumentarán as nubes e teremos as primeiras chuvias no terzo norte e na fin de semana estas chuvias serán intermitentes pero algo máis xeneralizadas.

A chegada desta masa ven propiciada pola formación dun corredor de isobaras ente o anticiclón que seguirá no Atlántico e unha borrasca estendida dende o Mediterráneo occidental ata Europa central e oriental, tal como se pode ver na figura anterior. Nesa figura apréciase tamén que a orixe da masa de aire atópase ao norte de Islandia, polo que podríamola clasificar como Aire Ártico Marítimo. Por tanto, á baixada de temperatura e os chuvascos previstos na fin de semana haberá que engadirlle intensos ventos do norte que deixarán unha sensación térmica por debaixo do que marquen os termómetros.

En fin, primavera en estado puro, con oscilacións bruscas entre un tempo que semella verán, pero puntuado cos derradeiros coletazos do inverno.

Saúdos,

Juan Taboada

 

Publicado en Sen categorizar | Deixa un comentario

Chegan as altas presións a Galicia

Finalmente as altas presións foron subindo en latitude e xa na fin de semana comezamos a notar os seus efectos. De tódolos xeitos a presenza dunha profunda borrasca no Atlántico norte tamén se fixo notar, con ventos de compoñente sur e un sistema frontal que onte a partir de media tarde deixou chuvias, bastante cuantiosas en Pontevedra e A Coruña, e menos intensas en Lugo, quedando sen chuvia en xeral a provincia de Ourense.

Pero o significativo é que esta semana haberá un predominio da estabilidade, de xeito que a partir desta tarde agardamos ver o ceo azul e as temperaturas irán ascendendo. Acadaremos os valores máis altos da semana o mércores pola tarde. O xoves previsiblemente haberá un empeoramento, pero agardamos que sexa transitorio e o tempo estable se manteña tamén para a vindeira semana.

Na seguinte figura podedes ver a previsión da presión en superficie para o mércores ao mediodía.

Apréciase perfectamente que as borrascas do Atlántico seguen sendo profundas, 992 mb ao oeste de Irlanda, pero a cuña anticiclónica consigue protexer a Galicia. As cores representarían a temperatura do aire na columna. Podedes ver que o área de máis diferencias está algo máis ao norte da península Ibérica. Iso ten a súa importancia posto que por esa zona vai a corriente en chorro, que é a que move as borrascas.

Saúdos,

Juan Taboada

 

 

Publicado en Prognóstico | Deixa un comentario

Que pasou nestas derradeiras semanas?: Ligazóns interesantes

Estes últimos días foron de moito traballo para os meteorólogos por mor deste incesante paso de borrascas preto da península Ibérica. O mes de marzo resultou ser o terceiro máis húmido da serie historica en Galicia que comeza en 1960. O rexistro record continúa sendo o do 2001.

A causa deste anómalo comportamento foi a presenza dun centro de altas presións entre Inglaterra e Escandinavia. Normalmente nesta época do ano as borrascas, que se forman na interfase entre o aire cálido subtropical e o aire frío polar, deberían circular entre a costa canadiense e o Mar do Norte, pero ao atoparse con ese anticiclón, simplemente móvense cara ao sur, polo que a súa traxectoria corta á península Ibérica e polo tanto tódalas borrascas nos afectan de cheo. De feito, no norte e centro de Europa viviron unhas semanas moi frías, con nevadas bastante importantes, producto dese anticiclón escandinavo, mentres aquí sufríamos as chuvias.

Para ver máis gráficamente esta explicación recoméndovos un par de vídeos dun programa que se titula “Historias do Tempo”, no que suelo colaborar frecuentemente.  O programa emítese en V televisión e podedes atopar cuestións moi curiosas. Se tedes tempo podedes ir vendo algúns destes vídeos. Concretamente neste explicamos como funcionan os anticiclóns e as borrascas e a causa de que os anticiclóns non cheguen a Galicia.  Se ides á ligazón de máis videos, existe outro anterior, titulado “¿Por qué no para de llover en Galicia?” no que tamén se fai fincapé na explicación das altas presións escandinavas como causa do mal tempo en Galicia.

Por último, deíxovos tamén unha ligazón a unha nova do xornal La Vanguardia no que o movemento anómalo da corrente en chorro se relaciona coa falta de xeo no Ártico a principios do outono. Casualmente na revista Investigación y Ciencia  trataran este tema no número de febreiro. Os que o teñades acceso á versión en papel podedes darlle un repaso. Os que non, tedes un resumo na web.

Que gozedes dos vídeos e as lecturas durante a fin de semana.

Saúdos,

Juan Taboada

 

 

 

Publicado en Sen categorizar | Deixa un comentario